Taolkelender vaan ’t Mestreechs

Eus MCC-lid Flor Aarts hèlt ziech al hiel lang bezeg met sjrieve euver ’t Mestreechs. Zien ierste book, Mestreechs. Eus Moojertaol , versjeen in 2001 en woort gesponsord door André en Marjorie Rieu. Recentelek heet heer ’nen Taolkelender vaan ’t Mestreechs gesjreve, dee obbenuits door de Rieus is gesponsord.

In deze kelender stoon 365 taoltips of vraoge euver ’t Mestreechs (veur ederen daag vaan ‘t jaor ein vraog). Dees vraoge höbbe betrèkking op versjèllende aspecte vaan eus dialek, beveurbeeld op de grammatica, de spelling, de vocabulaire, de vraog ‘Boe koume eus Mestreechter wäörd vaandan?’ en ouch op oetdrökkinge en gezègkdes. Eder vraog weurt op de volgende pagina vaan de kelender beantwoord. Dat beteikent tot de lezer in de gelegenheid weurt gestèld um zien / häör kinnes vaan ’t Mestreechs te teste of te verbetere. Op Facebook kint geer oonder “De spriks Mestreechs este…” mie dreuver leze.

De motivering bij ’t samestèlle vaan deze kelender waor twieledeg : sprekers vaan ’t Mestreechs get geve wat ze leuk vinde, meh tegeliekertied hun ’ne gids aonreike boe ze get aon höbbe es ze ziech mondeling of sjriftelek in ’t Mestreechs wèlle oetdrökke.

D’n Taolkelender weurt binnekort gedrök. Heer zal € 15 goon koste en zal bij de Bijekörf te koup zien bij de kedo-aofdeiling. ’t Zouw sjiek zien es MCC lede dee Kelender zouwe aonsjaffe. Mesjiens höb geer ouch vrun of kinnesse die belangstèlling höbbe.

Es geer ‘m koup, daot geer e good werk, want de opbrings geit in ze gehiel nao de Stichting Stille Armen Maastricht. Die stiechting liet in de keerstied hoonderde keerspakkètte bezörge en steit lui bij die financieel in meujlekhede koume.

 

 

2 reacties

  1. sjo smeets op 19 december 2018 om 16:51

    Is d’n taolkelender vaan ‘t Mestreechs al oetverkoch?



    • Roel op 20 december 2018 om 10:45

      Gein idee. Vraog dit aanders aon de kedo-aofdeiling vaan de Bijenkorf.